बुद्ध जयन्तीको अवसरमा कोरियामा शान्ति दिप महोत्सव, नेपालबाट ल्याइएको बुद्ध प्रतिमालाई नगर परिक्रमा

907

कोरियामा प्रत्येक वर्ष बुद्ध जयन्तीको अवसरमा आयोजित लोटस लाल्टिन फेस्टीभल अर्थात शान्ति दिप महोत्सवमा नेपालबाट ल्याइएको बुद्धको प्रतिमालाई नगर परिक्रमा गराइएको छ । नेपाल सम्पर्क समिति एनसिसिको संयोजन र नेपाल बौद्ध परिवारको सहकार्यमा थालिएको बुद्ध प्रतिमा प्रतिस्थापन अभियानबाट ल्याइएको बुद्ध प्रतिमालाई नगरपरिक्रमा गराइएको हो । हिजो शनिवार विषम मौषमका बीच राजधानी सउलको हिस्ट्री एण्ड कल्चरल पार्कबाट कोरियामा रहेको सयौ बौद्ध धर्मगुरुले मन्त्रोच्चारण गरेपछि शुरु भएको शान्ति दिप ¥याली डेढ किलोमिटरको पदयात्रा पछि जोगेशा गुम्बामा समापन भएको थियो । कोरियाको क्यालेण्डर अनुसार पर्ने बुद्ध जयन्तीमा चीन, नेपाल, भियतनाम, थाईल्याण्ड, कम्बोडिया,श्रीलंका, लाओस, मंगोलिया सहित दर्जनौ मुलुक र सयौ गुम्बाले दिप, सांस्कृतिक झाँकी र बुद्धको प्रतिमालाई लिएर नगर परिक्रमा गरेका थिए भने सडकको किनारमा रहेका लाखौ दर्शकले उनिहरुलाई स्वागत गरेका थिए । कोरियाका राष्ट्रिय टेलिभिजनहरुले शान्ति दिप सहित पदयात्राको प्रत्यक्ष प्रसारण गरेका थिए भने सवै सहभागीले उज्यालो बुद्धको प्रतिमालाई लिएर हिडेका थिए । सहभागी विभिन्न राष्ट्रले बुद्ध तिर्थायटनको प्रचार गर्ने गरी झाँकी प्रदर्शन गरेका थिए । यसपाली नेपालबाट ल्याइएको बुद्धको प्रतिमा विशेष रहेका थियो । पहिलो पटक नेपालबाट ल्याइएको बुद्धको प्रतिमालाई नगर परिक्रमा गराउदाँ नेपाली पञ्चे बाजा समेत बजाइएको थियो जसले धेरै कोरियन तथा विदेशी पर्यटकको ध्यान आकृष्ट गरेको थियो ।
बुद्ध नेपालमा जन्मिएको सन्देश र भ्रमलाई चिर्न बुद्ध प्रतिमा प्रतिस्थापन अभियान मार्फत ल्याइएको बुद्ध प्रतिमालाई नगरपरिक्रमा गराउदाँ केहि हदसम्म भ्रम चिर्न सफल हुने विस्वास अभियानको छ । बुद्धको प्रतिमालाई पर्यटकिय नगर योङईनस्थित वाउछङ्सा गुम्बामा प्रतिस्थापन गर्ने तयारी भइरहेको छ । झण्डै एक करोड रुपैयाको लगानीमा उक्त गुम्बामा नेपालबाट ल्याइएको बुद्धको प्रतिमा प्रतिस्थान यहि मे २० तारिख हुदै छ ।
यसैबीच आज आइतबार जोगेशा गुम्बा परिसरको सडकको दुवै किनारमा विभिन्न मुलुक र गुम्बाका बुद्ध सम्बन्धी र तिर्थायटनका प्रचार सामाग्रीको स्टल राखिएको छ ।
प्रतिक्रियाहरू