बुद्ध प्रतिमा स्थापनामा महत्वपुर्ण सहयोग गरेको भन्दै अभियानद्धारा सम्पुर्ण सहयोगीलाई विशेष धन्यवाद प्रकट, आज विशेष पुजा

1551
कोरियामा ऐतिहासिक बुद्ध प्रतिमा प्रतिस्थापनमा सहयोग गर्ने सम्पुर्ण सहयोगीहरुलाई बुद्ध प्रतिमा स्थापना अभियानले विशेष आभार प्रकट गरेको छ । अभियान शुरु भए पछि आर्थिक लगायत सहयोग गर्ने कोरियामा रहेको सहयोगी मनका नेपाली, संघसंस्था, व्यावसायि, पत्रकार, विद्यार्थी सवैलाई अञ्जु केसी संयोजकको पन्ध्र सदस्यीय अभियान समितिले विशेष धन्यावाद दिएको हो । त्यस्तै अभियानले लोटस लाल्टीन फेस्टीभल र बुद्धको मुर्ती अनावरणमा विशेष सहयोग गरेर अद्भुत पार्ने वाद्य वादक, विभिन्न जातिय भेषभुषा सहितको सांस्कृतिक टिमलाई पनि अभियानले धन्यावाद दिएको छ । पञ्चेबाजा र धार्मिक बाजाका कारण बुद्ध प्रतिमालाई नगर  परिक्रमा गराउदाँ र अनावरण गर्दाको दिनलाई ऐतिहासिक र उल्लासमय पार्न बाद्यकर्मीहरुको उल्लेखनिय योगदान रहेको थियो । पञ्चेबाजा र धार्मिक बाजाको धुनले सहभागि नेपाली र विदेशीमा रौनकता छायेको थियो ।
 
सम्भवतः कोरियामा नेपालीद्धारा पहिलो पटक पञ्चे बाजा सहित बुद्धको मुर्तीलाई प्रतिस्थापन  गरेका हुन् । यसैगरी अभियानले बुद्ध प्रतिमालाई नेपालबाट कोरिया ल्याएर अनाबरण गर्दा सम्म विशेष पुजाआजा गर्ने र विविध तरिकाले सहयोग गर्ने सउल गुम्बाका प्रमूख तथा लामा कुसाङ लामा र लामाको टिम सबैप्रति आभार प्रकट गरेको छ । यसैगरी फेस्टीभल र अनावरणको दिनलाई ऐतिहासिक र नेपालीबीचको एकता सदैव रहन्छ भन्ने सन्देश दिने गरेर राष्ट्रिय अभियानमा ऐक्बद्धता जनाउनु हुने सम्पुर्ण सहभागी नेपाली दाजुभाई प्रति विशेष आभार प्रकट समेत अभियानको छ । बुद्धको जन्मस्थल बारे भइरहेको भ्रमलाई चिरेर नेपालको पर्यटन प्रवद्र्धन हुने गरी भएको बुद्ध प्रतिमा स्थापना अभियान सफल भएपछि यसको चौतर्फी तारिफ र चर्चा भइरहेको छ । नेपाल सरकार र त्यस मातहातका निकायले गर्नुपर्ने कार्य नेपाली समूदाय अग्रसर भई कार्य सम्पन्न गरेको भन्दै कोरिया बाहेक अन्य मुलुकमा रहेका नेपालीले प्रशंसा समेत गरिरहेका छन् । परदेशमा रहेर पनि आफ्नो मातृभुमिलाई केहि गर्न सकिन्छ भन्ने गतिलो उदाहरण समेत प्रस्तुत गरेपछि अन्य मुलुकमा रहेका नेपालीलाई यसको सिको गर्न झक्झाएको छ ।
 
यसैबीच अभियानका संयोजक अञ्जु केसीले आर्थिक सहयोग गर्ने नेपाली दाजुभाई, संघसंस्था, व्यावसायि लगायत सम्पुर्णलाई छिट्टै नै विशेष कार्यक्रम गरेर सम्मान र सम्मानपत्र प्रदान गर्ने बताउनु भएको छ । अनावरणका दिन सवै सहयोगी मनका सहयोगदातालाई सम्मान र सम्मानपत्र दिन असम्भव भएकोले छिट्टै मिति सार्वजानिक गरेर विशेष सम्मान गर्ने तयारी रहेको उहाँले बताउनु भयो । अभियान बृहत् भएकोले कार्यक्रम र अभियानका क्रममा केहि त्रुटि भए त्यसलाई सकरात्मकरुपमा लिएर क्षमायाचना गर्न पनि अभियान कमिटिले आग्रह गरेको छ ।
 
झण्डै ४ महिना लगाएर कोरियाको पर्यटकिय नगरी योङईनस्थित वाउछङसा गुम्बामा नेपाली बुद्धको मुर्ती प्रतिस्थापन गरिएको हो । अभियानमा नेपाल सम्पर्क समिति एनसिसिको संयोजन, नेपाल बौद्ध परिवारको सहकार्य र नेपाली दूतावास संरक्षक रहेको छ भने कोरियामा रहेका नेपाली गुम्बाहरुको आर्थिक लगायतको सहयोग पनि छ ।
 

यसैबीच बुद्धको मुर्तीको अनावरण गरेको तेश्रो दिन आज वाउछङसा गुम्बास्थित नेपाली बौद्ध स्तुपामा पुजाआजा गरिएको छ । अभियानका संयोजक अञ्जु केसी, अभियानकर्मी भक्त शेरचन, अभियान्ता डम्बर सुब्बा सहितकाको उपस्थितिमा नेपाली र कोरियन लामा गुरुले बुद्धको प्रतिमामा पुजाआजा गरेका हुन् । आज कोरियन क्यालेन्डर अनुसार बुद्ध जयन्ती परेको छ ।

प्रतिक्रियाहरू